शिवम् सिमेन्ट्सको नाफा प्रभावित हुँदा इपीएस कति ?

काठमाडौं : शिवम् सिमेन्ट्सले चालु आर्थिक वर्ष २०७९–८० को दोस्रो त्रैमाससम्मको वित्तीय विवरण सार्वजनिक गरेको छ । यस अवधिसम्म आइपुग्दा कम्पनीले ३२ करोड ९० लाख रुपैयाँ खुद नाफा कमाएको छ । यो गत वर्षको यसैअवधिको भन्दा २३% ले थोरै हो । गत वर्षको यही अवधिमा यसले ४२ करोड ७३ लाख रुपैयाँ खुद नाफा आर्जन गरेको थियो । पुस मसान्तसम्म सञ्चालन आम्दानी पनि २७.३७% ले घटेर ३ अर्ब ३४ करोड रुपैयाँ कायम भएको छ । गत वर्ष उक्त आम्दानी ४ अर्ब ६० करोड रुपैयाँ रहेको थियो । यसले गर्दा कम्पनीको नाफामा असर परेको छ । 

 

यसको अन्य आम्दानी भने भारी मात्राले बढेको छ । गत वर्ष १ करोड ३५ रुपैयाँ रहेको अन्य आम्दानी यो वर्ष बढेर ३२ करोड ३६ लाख रुपैयाँ पुगेको छ । यसको चुक्ता पुँजी ४ अर्ब ४० करोड रुपैयाँ छ । यसको रिजर्भ कोषमा ३ अर्ब ७४ रुपैयाँ रहेको छ । सेयर प्रिमियममा ९५ करोड ६२ लाख रुपैयाँ जम्मा भएको छ । पुस मसान्तसम्म आइपुग्दा प्रतिसेयर आम्दानी १४ रुपैयाँ ९६ पैसा (बार्षिक) रहेको छ । कम्पनीको प्रतिसेयर नेटवर्थ २०६ रुपैयाँ ८५ पैसा छ ।