राष्ट्रिय स्वतन्त्र पार्टीका तीन मन्त्रीको राजीनामा स्वीकृत, मन्त्रालय प्रधानमन्त्रीले सम्हाल्ने

राष्ट्रिय स्वतन्त्र पार्टीका तीन मन्त्रीको राजीनामा स्वीकृत भएको छ । सोमबार राष्ट्रपति कार्यालयले जारी गरेको विज्ञप्ति अनुसार श्रम, रोजगार तथा सामाजिक सुरक्षामन्त्री, शिक्षा र विज्ञान तथा प्रविधि मन्त्रीको राजीनामा स्वीकृत गरिएको हो ।

रास्वपाका श्रम, रोजगार तथा सामाजिक सुरक्षामन्त्री डोलप्रसाद अर्याल, शिक्षा, विज्ञान तथा प्रविधिमन्त्री शिशिर खनाल र स्वास्थ्य तथा जनसंख्या राज्यमन्त्री तोसिमा कार्कीले आइतबार बेलुकी प्रधानमन्त्री पुष्पकमल दाहालसमक्ष राजीनामा बुझाएका थिए ।

सरकारलाई समर्थन गरेपनि सरकारबाट बाहिरिने रास्वपाको केन्द्रिय समिति र संसदीय दलको बैठकले हिजाे निर्णय गरेको थियो । पार्टिका सभापति रवि लामिछानेले पत्रकार सम्मेलन गर्दै तीन मन्त्रीहरुले राजीनामा दिने घोषणा गरेसँगै उनीहरु प्रधानमन्त्री कार्यालय पुगेका थिए ।

तीन मन्त्रीहरुको राजीनामा दिएकाले प्रधानमन्त्रीको सिफारिसमा शिक्षा, विज्ञान तथा प्रविधि मन्त्रालय र श्रम मन्त्रालयको कार्यभार प्रधानमन्त्री प्रचण्ड’ले सम्हाल्ने गरी राष्ट्रपति विद्यादेवी भण्डारीले तोकेको राष्ट्रपति कार्यालयका प्रवक्ता समिर आचार्यले बताए ।